Insight into computer-mediated communication

Abstract

Á undanförnum árum hefur þróast á Íslandi eins og víða annars staðar sýndarveruleiki til hliðar við raunveruleikann og í gagnkvæmum tengslum við hann. Internetið hefur vaxandi áhrif á líf Íslendinga með þeim samskiptamöguleikum sem það býður upp á. Aukið mikilvægi samskipta gegnum rafræna miðla hvetur til rannsókna á málnotkun við nýjar aðstæður. Því hefur verið haldið fram að netsamskipti (e. computer-mediated communication, CMC), þ.e.a.s. (gagnvirk) samskipti með stafrænum rafeindatækjum eins og tölvum og símum, samræmist ekki venjulegum viðmiðum ritmálsins þar sem málnotkunin lagi sig að nýjum möguleikum og takmörkunum. Markmið greinarinnar er að gefa innsýn í íslensk netsamskipti. Athugunin byggist á safni færslna úr virkum Facebook-hópi og valin dæmi úr efninu varpa ljósi á ýmis einkenni slíkra samskipta á íslensku. Meðal þeirra eru einkenni sem gjarnan eru tengd talmáli svo sem ensk lán, bæði stök orð og frasar, og upphrópanir. Einnig birtast einkenni sem endurspegla aðferðir til þess að koma til skila í riti hljómrænum og myndrænum þáttum munnlegra tjáskipta, t.d. tónfalli, áherslum og svipbrigðum, auk atriða sem spretta af þörf á að einfalda og flýta fyrir ritun. Þar sem margir þessara þátta víkja frá því sem hefur tíðkast í ritmáli almennt er því haldið fram að netsamskipti leiði til nýs afbrigðis af ritaðri íslensku.